Чувашские молитвы на чувашском языке
Молитвы утренние на чувашском языке.
Ашшĕн, Ывăлĕн, Святой Сывлăшĕн ячĕпе. Аминь.
Эй, Турă, хĕрхенсем мана, çылăхлă çынна. (Лк.18,13)
Эй, Турă, Турă Ывăлĕ Иисус Христос, çырлах мана, çылăхлăскере.
Эй, Турă, Турă Ывăлĕ Иисус Христос, Хăвăн чăн Таса Аннÿ кĕлтунипе, мĕнпур святой çынсем кĕлтунипе çырлах пире. Аминь.
Мухтав Сана, Туррăмăр, мухтав Сана.
Святой Сывлăша йăлăнмалли кĕлĕ
Эй, Çÿлти Патша, Эсĕ чуна лăплантаратăн, Эсĕ тÿрĕ Сывлăш, Эсĕ пур çĕрте пур, Эсĕ пурне те пултаратăн, пур ырăлăх та Санран тухать, чĕрĕлĕх те Эсĕ паратăн, пирĕн ăша кĕрсе вырăнаç; пур усалтан тасат пире, ырă Турă, пирĕн чунсене çăл.
Святой Турă, Святой Хăватлă, Святой Вилĕмсĕр, çырлах пире (3 хут каласа с ă хс ă хламалла).
Мухтав Ашшĕне, Ывăлне, Святой Сывлăшне, халĕ те, кирек хăçан та, ĕмĕр-ĕмĕрех. Аминь.
Виç ипостаçлĕ Турра йăлăнмалли кĕлĕ
Чăн таса Виç ипостаçлĕ Турă, Ху ятушăн çырлах пире. Эй, Турă, çылăхран тасат пире; эй, Патша, эпир йĕркесĕр пурăннине каçар; эй, Святой Сывлăш, пирĕн вăйсăрлăха килсе тÿрлет.
Эй, Турă, çырлах (3 хут).
Мухтав Ашшĕне, Ывăлне, Святой Сывлăшне, халĕ те, кирек хăçан та, ĕмĕр-ĕмĕрех. Аминь.
Эй, Çÿлти Аттемĕр, Санăн яту хисеплентĕр, Санăн Патшалăху килтĕр, Санăн ирĕкÿ çĕр çинче те Çÿлти пекех пултăр; паян пурăнмалăх çăкăр пар пире; эпир хамăра парăмлă пулнисене каçарнă пек, пирĕн парăмсене каçар пире; çылăха ан кĕрт пире; усалтан хăтар пире.
Унтан Виç ипостаçлĕ Турра кĕлтумалли тропарьсем.
Эй, хăватлă ырă Турă, çывăрса тăрсан Сана пуççапатпăр, Сана Ангел юрри юрлатпăр: эй, Святой, Святой, Святой Турă, Турă Амăшĕ кĕлтунипе хĕрхен пире.
Мухтав Ашшĕне, Ывăлне, Святой Сывлăшне : Эй, Турă, Эсĕ мана ыйхăран сывă тăратрăн, — ăсăма, чĕреме тасат; Сана, Виç ипостаçлĕ Таса Турра, мухтаса юрлама чĕлхеме уç: эй, Святой, Святой, Святой Турă, Турă Амăшĕ кĕлтунипе хĕрхен пире.
Халĕ те, кирек хăçан та, ĕмĕр-ĕмĕрех. Аминь : Аслă Тÿре суд тума сасартăк килĕ, мĕн тунисем пурсăмăрăн та курăнса тăрĕç; çавăнпа хăраса çур çĕртех кĕлтăвар: эй, Святой, Святой, Святой Турă, Турă Амăшĕ кĕлтунипе хĕрхен пире.
Эй, Турă, çырлах (12 хут).
Виç ипостаçлĕ Турра кĕлтумалли кĕлĕ:
Эй, Виç ипостаçлĕ Таса Турă, çывăрса тăрсан Сана тав туса пуççапатăп; Эсĕ Ху нумай тÿсĕмлĕрен, ырă кăмăллăран мана, наяна, çылăхлăскере, çилленсе çылăхăмсемпех пĕтермерĕн; Хăвăн этеме юратакан кăмăлупа хĕрхенсе тăрса çук çĕртен тăратрăн; ирхи кĕлле тăрса Хăвăн хăватна мухтамалла турăн. Ĕнтĕ манăн шухăшăмсене тасат, чĕлхе-çăварăма уç: Санăн сăмахусене вĕренем. Эсĕ кăтартнă йĕркесене ăнласа илем, Эсĕ хушнине тума тытăнам, Сана чунтан-вартан аслăлам, Санăн чăн таса ятна мухтаса юрлам:
Ашшĕне, Ывăлне, Святой Сывлăшне, халĕ те, кирек хăçан та, ĕмĕр-ĕмĕрех. Аминь.
Килĕр, Патша Туррăмăра пуççапар. (пуççапмалла)
Килĕр, Христоса, Патша Туррăмăра ÿксе пуççапар. (пуççапмалла)
Килĕр, Христоса, Патша Туррăмăра Хăйне ÿксе пуççапар. (пуççапмалла)
Эй, Турă, Хăвăн аслă ырăлăхупа хĕрхенсем мана, Хăвăн вĕçĕмсĕр ырă кăмăлупа йĕркесĕрлĕхĕме тасатсам. Манăн йĕркесĕрлĕхĕме пĕтĕмпех çуса ярсам, çылăхăмран мана тасатсам. Йĕркесĕр ĕçĕме пĕлетĕп; çылăхăм яланах хам умра. Пĕр Сан умăнта çылăха кĕтĕм, Сан умăнтах усал ĕç турăм: Эсĕ Хăвăн сăмахусенче тÿрре тухăн, суд тăвас пулсан мана айăплăн. Эпĕ аннем ăшĕнчех çылăхпа пуçланнă, аннемех мана çылăхлă çуратнă. Эсĕ чăнлăха юрататăн: пĕлме хал çук ăслăлăхна мана пĕлтертĕн. Эсĕ иссоппа сирпĕтсен эпĕ тасалăп, мана çуса тасатсан эпĕ юртан та шурă пулăп. Хăлхама хĕпĕртесе савăнмалли хыпар кĕрт, вара ваннă шăммăм-шаккăм та савăнĕччĕ. Манăн çылăхăмсенчен сăнна тÿртĕн тытсам, пур йĕркесĕрлĕхĕмсенчен те тасатсам мана. Эй, Турă, ман ăшăма таса кăмăл кĕрт, ăшăмри шухăша çĕнетсе тÿрĕ ту. Мана Хăвăнтан ан пистерсем, Хăвăн Святой Сывлăшна туртса ан илсем манран. Ху çăлассипе савăнтар мана, хăватлă Сывлăшупа тĕреклĕлентер мана. Иĕркесĕр пурăнакансене санăн çулусене вĕрентĕп, çылăхлă çынсем Сан еннелле çавăрăнĕç. Эй, Турăçăм, мана çăлакан Турă, юн тăкнă çылăхран хăтар мана, чĕлхем вара Санăн тĕрĕслĕхÿшĕн савăнĕ. Эй, Турă, чĕлхе-çăварăма уç, чĕлхе-çăварăм Санăн мухтаву çинчен калаçĕ. Эсĕ парнене кăмăл тунă пулсан, панă пулăттăм, анчах Эсĕ парне çунтарса панине хапăл тумастăн. Турă парни — хуйхăллă чун, хуйхăллă йăваш чĕрене Турă пăрахмасть. Эй, Турă, Хăвăн кăмăлупа Сиона ырлăхна çитер: Иерусалим хÿмисене хÿсе çаврăнмалла пултăр. Вара Эсĕ тĕрĕслĕх парнипе мухтав парнине, çунтарса панă парнесене те хапăл тăвăн, ун чухне сана парне к ӳ рекен вырăн çине пăрусем пусса хурĕç.
Пĕр Атте Турра ĕненетĕп. Вăл пурне те тытса тăрать; Пĕлĕте, çĕре, курăнаканнине, курăнманнине, пурне те Вăл пултарнă, тесе. Тата пĕр Иисус Христос Турра ĕненетĕп, Вăл Туррăн пĕртен-пĕр Ывăлĕ. Вăл пур ĕмĕртен малтан Ашшĕнчен çуралнă: Вăл, çутăран çутă тухнă пек, чăн Турăран çуралнă чăн Турă, Ăна пултарман, Вăл çуралнă; Вăл Ашшĕпе пĕрех, пурне те Вăл пултарнă, тесе. Вăл пире, этемсене, çăласшăн Çÿлтен анса Святой Сывлăш хăвачĕпе Мария Хĕртен ÿтленсе çын пулнă, тесе. Понтий Пилат пурăннă вăхăтра Ăна пирĕншĕн хĕрес çумне пăталаса, асаплантарса вĕлерсе пытарнă, тесе. Турă Çырăвĕнче çырнă пек, Вăл виççĕмĕш кунне вилĕмрен чĕрĕлсе тăнă, тесе. Вăл Пĕлĕт çине çĕкленсе Ашшĕн сылтăм енне ларнă, тесе. Вăл чĕррисене те, вилнисене те суд туса уйăрма аслăлăхĕпе татах килмелле, Унăн Патшалăхĕ нихăçан та пĕтес çук, тесе. Тата Святой Сывлăш Турра ĕненетĕп, Вăл чĕрĕлĕх парать, Вăл Ашшĕнчен тухать. Ăна Ашшĕпеле, Ывăлĕпеле пĕрле мухтаса пуççапмалла; пророксене Вăл калаттарнă, тесе. Чиркĕве ĕненетĕп, Вăл пĕреççех, таса, пĕтĕм çĕр çинче пĕрре анчах, Вăл апостолсенчен юлнă, тесе. Çылăха каçарттармашкăн пĕрре анчах тĕне кĕмеллине пĕлсе тăратăп. Вилнĕ çынсем чĕрĕлсе тăрассипеле леш тĕнчере ĕмĕр-ĕмĕрех пурăнассине кĕтсе тăратăп. Аминь.
1-мĕш кĕлĕ, Аслă святой Макарий кĕлли
Эй, Турă, тасатсам мана, çылăхлăскере. Санăн умăнта эпĕ нихăçан та пĕр ырă ĕç те туман; çапах та усалтан хăтар мана, ман ăшăмра Санăн ирĕкÿ пултăр, çылăхла çăварăма айăпа кĕмесĕр уçма юрăхлă пулам. Санăн таса ятна мухтаса тăрам: Ашшĕне, Ывăлне, Святой Сывлăшне, халĕ те, кирек хăçан та, ĕмĕр-ĕмĕрех. Аминь.
2-мĕш кĕлĕ, çав святойăнах
Эй, Çăлакан, ыйхăран тăрса Сана çур çĕр кĕлли тăватăп, Сана ÿксе пуççапса йăлăнатăп; çылăхпах çывăрса кайса вилме ан пар мана.
Эй, Ху ирĕкÿпе пăталаннă Турă, ырăлăхна кăтарт мана, ÿркенсе выртнă çĕртен часрах тăрат мана, Ху умна тăрса кĕлтунипе çăл мана; çĕрлехи ыйхă хыççăн çылăхсăр ирттермелĕх кун çути пар, эй, Христос Турă, çăл мана.
3-мĕш кĕлĕ, çав святойăнах
Эй, этеме савакан Патша Турă; çывăрса тăрсанах Сана йăлăнатăп, Сан ырă кăмăлу çине шанса, Эсĕ хушнă ĕçе тума тытăнатăп. Сана пуççапса тархаслатăп: пур вăхăтра та, пур ĕçре те пулăш мана, ку тĕнчери тĕрлĕ усал ĕçе тăвасран сыхла, шуйттан улталаса çылăха кĕртесрен хăтар, Хăвăн ĕмĕрхи Патшалăхна çăлса кĕрт мана. Эсĕ мана пултаракан, пур ырăлăха кăларакан та, пур ырăлăха паракан та Эсех, мĕнпур ĕмĕтĕм манăн Сан çинче, Сана мухтатăп, халĕ те, кирек хăçан та, ĕмĕр-ĕмерех. Аминь.
4-мĕш кĕлĕ, çав святойăнах
Эй, Турă, Эсĕ Хăвăн нумай ырăлăхупа, вĕçĕмсĕр ырă кăмăлупа мана, ху чуруна, çак иртсе кайнă çĕре пур усал-тĕселтен те лайăх ирттерсе яма патăн. Эй, пурне те пултаракан Патша Турă, мана Хăвăн чăн çутупа çутат, чĕреме тасат, Ху хушнине туса пурăнма тивĕçлĕ ту мана, халĕ те, кирек хăçан та, ĕмĕр-ĕмĕрех. Аминь.
5-мĕш кĕлĕ, Аслă святой Василий к ĕ лли
Эй, пурне те тытса тăракан Турă, Ангелсенĕн те, этемсенĕн те Турри, Эсĕ Çÿлте пурăнса çĕр çинчисене куратăн, ăшри шухăшсене пĕлетĕн, этемен вăрттăн тăвас ĕçне те малтанах курса тăратăн; Эсĕ ĕмĕртен малтанхи вĕçĕмсĕр Çутă, Санăн улшăнасси, урăх тĕрлĕ пуласси нимĕн те çук; эй, вилĕмсĕр Патша, халĕ эпир Санăн ырă кăмăлу çине шанса çылăхлă чĕлхе-çăварпа Сана тархаслатпăр, пирĕн кĕллĕмĕре хапăл ил; эпир ĕçпе, сăмахпа, шухăшпа е пĕлсе, е пĕлмесĕр çылăха кĕнине пурне те каçар; ÿтĕмĕрсенĕн те, чунăмăрсенĕн ирсĕрлĕхне пурне те тасат, ку тĕнчери пурăнăçăн тĕттĕм çĕрне сыхă чĕрепе, таса шухăшпа ирттерсе яма пар пире; Хăвăн пĕртен-пĕр Ывăлу, пире çăлакан Туррăмăр Иисус Христос çутăлса килес куна кĕтсе хатĕрленсе тăма пар; Вăл аслă Тÿре пулса пурне те ĕçĕсем тăрăх суд тума аслăлăхĕпе килнĕ çĕре эпир ÿркенсе, çывăрса ан выртар, сыхă тăрса, ырă ĕçсем туса, хатĕрленсе кĕтсе илер; Унпа пĕрле Туррăн мухтавлă çуртне кĕрсе савăнар; унта Сана пĕр чарăнмасăр мухтаса юрлаççĕ, чĕлхе калайми Санăн илемлĕ сăнна курса тăракансем калама çук савăнаççĕ. Эсĕ пурне те çутăлтарса тасатакан чăн Çутă, Сана пур чун та ĕмĕр-ĕмĕрех мухтаса тăрать. Аминь.
6-мĕш кĕлĕ, çав святойăнах
Эй, ырăлăх паракан Çÿлти Патша Турă, Сана мухтатпăр: Эсĕ пирĕн умра ĕмĕртенпех темен чухлĕ аслă, пĕлме çук, чаплă, пит хăрушă ĕçсем туса тăратăн: Эсĕ пире тĕрексĕрскерсене канма, ĕçленипе ывăнакан ÿтĕмĕрсене çăмăллатма ыйхă панă. Тавтапуç Сана: Эсĕ пире çылăхăмăрсемпех пĕтермерен, Хăвăн этеме юратакан ырă кăмăлупа хĕрхенсе, пире тăрас çук çĕртен тăратрăн, Хăвăн хăватна мухтамалла турăн. Çавăнпа Сана, вĕçĕмсĕр ырăлăхлă Турра, йăлăнатпăр: пирĕн шухăш куçĕсене уç, ăсăмăрсене юлхавлăхăн йывăр ыйхинчен вăрат, чĕлхе-çăварамăрсене уç. Хăвна мухтаса тăмалла ту; вара Сана, пурте мухтаса тăракан ĕмĕртен малтанхи Атте Турра, пĕртен-пĕр Ывăлупа, пурне те чĕрĕ тăвакан чăн таса ырă Сывлăшупа пĕрле пур ырăлăхусемшĕн те мухтаса юрламалла пулар, халĕ те, кирек хăçан та, ĕмĕр-ĕмĕрех. Аминь.
6-мĕш кĕлĕ, çав святойăнах
Эй, ырăлăх паракан Çÿлти Патша Турă, Сана мухтатпăр: Эсĕ пирĕн умра ĕмĕртенпех темен чухлĕ аслă, пĕлме çук, чаплă, пит хăрушă ĕçсем туса тăратăн: Эсĕ пире тĕрексĕрскерсене канма, ĕçленипе ывăнакан ÿте-мĕрсене çăмăллатма ыйхă панă. Тавтапуç Сана: Эсĕ пире çылăхăмăрсемпех пĕтермерен, Хăвăн этеме юратакан ырă кăмăлупа хĕрхенсе, пире тăрас çук çĕртен тăратрăн, Хăвăн хăватна мухтамалла турăн. Çавăнпа Сана, вĕçĕмсĕр ырăлăхлă Турра, йăлăнатпăр: пирĕн шухăш куçĕсене уç, ăсăмăрсене юлхавлăхăн йывăр ыйхинчен вăрат, чĕлхе-çăварамăрсене уç. Хăвна мухтаса тăмалла ту; вара Сана, пурте мухтаса тăракан ĕмĕртен малтанхи Атте Турра, пĕртен-пĕр Ывăлупа, пурне те чĕрĕ тăвакан чăн таса ырă Сывлăшупа пĕрле пур ырăлăхусемшĕн те мухтаса юрламалла пулар, халĕ те, кирек хăçан та, ĕмĕр-ĕмĕрех. Аминь.
7-мĕш кĕлĕ, Туррăн Таса Амăшне кĕлтумалли
Эй, мана пăхса усракан Туррăн Амăшĕ, Санăн тивлетÿне мухтаса юрлатăп, Сана тархаслатăп, ман ăсăма хăватлăлантар. Христос хушнă пек тÿрĕ çулпа пыма вĕрент мана. Манран хуйха, йывăрлăха сирсе яр, юрласа тăма хăват пар. Эй, Турă суйласа илнĕ Таса Хĕр, çылăхсем туса çыхăннă çыххăмсене Ху кĕлтунипе салтса яр; çĕрле те, кăнтăрла та, хама хирĕç тăракан тăшмансенчен хăтарса, сыхласа тăр мана. Эй, чĕрĕлĕх паракан Турра çуратнă Хĕр, усал ĕçĕмпе вилнĕскере, чĕрт мана. Эй, нихăçан та анса ларми Çутта çуратнă Хĕр, манăн суккăрланнă чунăма çутат. Эй, Патшанăн тĕлĕнмелле çурчĕ, Турă Сывлăшĕн çурчĕ ту мана. Эй, Эмелçĕ çуратнă Хĕр, чунăма нумай çултанпа асаплантаракан сурансене тÿрлет. Пурăнăç тăвăлĕпе хумханса çÿрекенскере, мана ÿкĕнĕç çулĕ çине тăрат. Ĕмĕрлĕх вутран та, усал хуртсенчен те, тамăкран та хăтар мана: мана, нумай çылăхпа айăплăскере, шуйттансен савăнăçĕ ан ту. Эй, айăпсăр чăн Таса Хĕр, сисмесĕр тунă çылăхсемпе кивелнĕскере, çĕнет мана. Пур тĕрлĕ асапран та ютшăнтар мана: пуринĕн те Патшине тархасла. Мĕнпур святой çынсемпе пĕрле Пĕлĕт çинчи савăнăçа кĕме тивĕçлĕ ту мана. Эй, чăн Таса Хĕр, Хăвăн юрăхсăр чуру сассине илт. Эй, чăн Таса Хĕр, чунăм ирсĕрлĕхне тасатса куççулĕме юхмалла ту. Эй, мана пăхса тăракан Турă Амăшĕ, Сана пĕр чарăнмасăр чĕремпе ĕсĕкле-ĕсĕкле тархаслатăп: тăрăш маншăн, эпĕ йăлăнса кĕлтунине илт, ăна хĕрхенекен кăмăллă Турă патне çитер. Эй, Ангелсенчен те аслă Таса Хĕр, ку тĕнчери аскăн шухăшсене çĕнтерсе çиеле тухма пар мана, ырă тивлетÿ пăхса сыхласа тăтăр мана. Эй, пĕр айăпсăр Таса Хĕр, эпĕ Христоса кĕлтума ирсĕрленнĕ аллăма çĕклем, Сана мухтама çылăхлă чĕлхе-çăварăма уçам, тăрăшса тархасласа, чунăма пĕтерекен ирсĕрлĕхсенчен хăтар мана. Ăна хисеплеме те, пуççапма та тивĕçлĕ, халĕ те, кирек хăçан та, ĕмĕр-ĕмĕрех. Аминь.
8-мĕш кĕлĕ, хамăрăн Туррăмăра Иисус Христоса кĕлтумалли
Эй, нумай ырăлăхлă, пит хĕрхенекен Иисус Христос Туррăмăрçăм, Эсĕ пурне те хытă юратнă тăрăх пире çăласшăн Çÿлтен анса ÿтленнĕ; эй, Çăлакан, Сана тархаслатăп, Хăвăн ырăлăхупа каллех çăл мана. Анчах ĕçсемшĕн кăна çăлас пулсан вăл ырăлăхпа ахалех çăлни мар, тивĕçлĕрен çăлни. Эй, нумай уçă кăмăллă, чĕлхе калайми хĕрхенекен Христосăм, Эсĕ Ху каланă: Мана ĕненекен чĕрĕ пулĕ, вăл ĕмĕрне те вилĕм курмĕ, тенĕ. Сана ĕненни ĕмĕт çухатнисене çапла çăлать пулсан, акă эпĕ ĕненетĕп ĕнтĕ, çăл мана: Эсĕ манăн Туррăм, мана Пултаракан Тура. Эй, Туррăм, эпĕ ĕненни ĕçĕмсем вырăнне пултăр, мана хама тÿрре кăларакан ĕçсене манра пĕрре те тупаймăн. Пурин вырăнне те маншăн пĕр çав ĕненни пултăр, çавах маншăн хута кĕтер, çавах мана тÿрре кăлартăр, çавах мана Хăвăн ĕмĕрлĕх мухтав-лăхна пая кĕрттĕр. Эй, Сăмах Турă, çапла вара шуйттан мана туртса илме те ан пултартăр, Сан аллунтан, Сан хÿттÿнтен туртса илĕп тесе те ан мухтантăр. Эй, Çăлакан Христосăм! Хам çăлăнасшăн пулсан-пулмасан та çăл мана; эпĕ пĕтĕмпех пĕтрĕм; хăвăртрах, хăвăртрах килсе çăл мана; эпĕ аннем ăшĕнче чухнех Эсĕ манăн Туррăм. Эй, Турă, эпĕ ĕлĕк çак çылăхах юратнă пек, халĕ ĕнтĕ мана Хăвна юратма тивĕçлĕ ту, ĕлĕк ултавçă шуйттана ĕçлесе пурăннă пек, халĕ ĕнтĕ пĕр ÿркенмесĕр каллех Хăвна тăрăшса ĕçлесе пурăнма юрăхлă ту мана. Эпĕ хам пурăнăçăмăн пур кунĕнче те пуринчен ытла Сана, хам Туррăма Иисус Христоса, ĕçлесе пурăнам, халĕ те, кирек хăçан та, ĕмĕр-ĕмĕрех. Аминь.
9-мĕш кĕлĕ, çынна сыхлакан Ангела кĕлтумалли
Эй, манăн мĕскĕн чунăмпа чарусăр пурăнăçăма пăхса тăракан святой Ангел, мана, çылăхлă çынна, ан пăрахсам; хама хам чарайманшăн мана пăрахса ан кайсам; ху вырăнна шуйттана парса çак халсăр ÿт-пĕвĕме ан пусмăрлаттар; вăйсăрланнă тĕрексĕр аллăмран хытă тытса, çăлăнăç çулĕпе ертсе кай мана. Эй, манăн мĕскĕн чунăмпа ÿт-пĕвĕме сыхласа усракан Туррăн святой Ангелĕ, пурăнан ĕмĕрĕм тăршшĕнче Сана мĕн кÿрентернине пурне те каçар мана, çак иртнĕ каç çылăха кĕнине те паянхи кун каçар, усал кирек епле улталасран та сыхла мана, пĕр çылăхпа та манăн Турра кÿрентерес марччĕ: маншăн Турра тархасла. Вăл мана яланах Хăйĕнчен хăраса тăмалла тăвинччĕ, эпĕ Унăн ырăлăхне курма тивĕçлĕ чура пулăпинччĕ. Аминь.
10-мĕш кĕлĕ, Туррăн Таса Амăшне кĕлтумалли
Эй, мана пăхса усракан чăн Таса Турă Амăшĕ, Хăвăн хăватлă таса кĕллÿпе мана, нимĕне юрăхсăр йĕрĕнмелле чуруна, хуйха ÿкесрен, манăçа каясран, ăса çухатасран, ÿркенесрен хăтар. Пур ирсĕр, усал, кирлĕ мар шухăшсене те манăн пăсăлнă чĕремрен, тĕтĕмленнĕ ăсăмран сирсе яр. Эпĕ мĕскĕн, йĕрĕнмелле çын: манăн чарусăр шухăшсенĕн çулăмне сÿнтер, ăшăма тĕрлĕ усал шухăш кĕрсе, ун хыççăн каясран сыхла, усал ĕçсем тума тытăнасран хăтар мана. Сана пур халăхсем те мухтаççĕ, Санăн чăн таса ятна ĕмĕр-ĕмĕрех аслăласа тăраççĕ. Аминь.
Хăвăн ятлă святоя йăлăнса кĕлтумалли
Эй, Турра юрăхлă пулнă Святой (ятне кала), Эсĕ мана час пулăшакан, ман чунăмшăн кĕлтăвакан, эпĕ Сана тархасласа йăлăнатăп, маншăн Турра кĕлту.
Турă Таса Амăшне мухтаса юрламалли юрă
Эй, Турра çуратнă Хĕр, савăн! Санпала Турă, тивлетлĕ Мария: Эсĕ пур хĕрарăмсенчен те мухтавлă. Санран çурални те мухтавлă, Эсĕ пирĕн чунсене Çăлакана çуратнă.
Хĕрес тропарĕ, тата çавах патшалăхшăн кĕлтумалли кĕлĕ
Эй, Турă, этемÿсене çăл, Хăвăн халăхна ырă курмалла ту, Чăн тĕне тĕрĕс тытса тăракан православи халăхне тăшманĕсене çĕнтерме вăй-хăват пар, Патшалăхна Хăвăн хĕресÿн хăвачĕпе усра.
Чĕррисемшĕн кĕлтумалли кĕлĕ
Эй, Турă, манăн çылăхăмсене каçарттаракан аттеме (ятне капа), манăн атте-аннеме, пиччем-шăллăмсене, аппам-йăмăкăмсене, тăванăм-хурăнташăмсене, тусăм-йышăмсене (ячĕсене кала) тата пĕтĕм православи халăхне çăл, ырăлăх ту, ку тĕнчере те, леш тĕнчере те ырă курмалла ту.
Вилнисене асăнмалли кĕлĕ
Эй, Турă, Хăвăн вилнĕ чурусенĕн, манăн аттемпе анненĕн, пур тăванăм-хурăнташăмсенĕн (ячĕсене асăнмалла) чунĕсене тата пĕтĕм православи халăхĕн чунĕсене канăçлăх пар тата вĕсен ирĕкпе е ирĕксĕр тунă çылăхĕсене каçарса Çÿлти Патшалăхна кĕрт.
Вăхăт пулсан, кĕске кĕлĕсем вырăнне çак асăнмалли кĕлĕсене вуламалла.
Чĕррисемшĕн кĕлтумалли кĕлĕ
Эй, Турă, эпир çылăха кĕнине çăмăллат, пăрах, каçар: ирĕклĕ е ирĕксĕр, сăмахпа е ĕçпе, пелсе е пĕлмесĕр, кăнтăрла е çĕрле, ăспа е шухăшпа çылăха кĕнине пурне те каçар пире: Эсĕ этем савакан ырă Турă.
Эй, этеме савакан Турă, пире кураймансене, пире хур тăвакансене каçар. Ырăлăх тавакансене ырăлăх ту. Пирĕн тăвансем, хурăнташсем çăлăнасшăн кĕлтунине илт, ĕмĕр-лĕх пурăнăçа кĕрт вĕсене. Чирлĕ выртакансем патне пырса чирĕсенчен сыват. Тинĕс çинче çÿрекенсене лайăх илсе çÿре. Çул çÿрекенсемпе пĕрле çÿре. Пире пулăшакансенĕн, пире хĕрхенекенсенĕн çылăхĕсене каçар. Пуринчен малтан Хăвăн таса, пĕтĕм çĕр çинче пĕрре анчах, апостолсенчен юлнă Чиркĕвне аса ил; Эсĕ Уншăн хăвăн таса юнна тăкнă; ăна хăватлăлантар, ÿстернĕçем ÿстер, пысăклантар, канлĕхлĕ ту, ăна тамăк вăйĕ çĕнейми туса, ĕмĕр-ĕмĕрех сыхă усра; ĕненекен тĕнсĕр халăхсене килĕштереймесĕр пурăнасран чар, тĕнсĕр халăхсене ан пусмăрлаттар, Чăн тĕне пăтратма тытăнакансенĕн шухăшĕсене ан çитер, пĕтер, Хăвăн Святой Сывлăшу хăвачĕпе вĕсене нимĕн те тăвайми ту.
Тата Чăн тĕне тĕрĕс тытса тăракансене: патшалăха пăхса тăракан аслă пуçлăхсене, çар пуçлăхĕсене, хула пуçлăхĕсене, Христоса юратса тăракан пур çара та çăл, ырăлăх ту. Çав пуçлăхсене канлĕ усра, хирĕç тăракан пур тĕрлĕ тăшмансене те вĕсен ури айне ту, вĕсене Хăвăн таса Чиркĕвÿпе пур çыннусене те канлĕ, ырă усрас шухăш пар, эпир те вара вĕсем лăпкă пăхса тăнипе пĕр пăтранмасăр, канлĕ, Чăн тĕне тĕрĕс тытса, Турăран хăраса, таса хальлĕн пурăнар.
Эй, Турă, Чиркĕве пăхса тăракан Святейший Патриарха (ятне каламалла), Чăн тĕне тĕрĕс вĕрентсе пурăнакан пĕтĕм тĕнчери святейший патриархсене, преосвященнăй митрополитсене, архиепископсене, епископсене, священниксене, монахсене, чиркÿре ĕçлесе пурăнакансене пурне те çăл, ырăлăх ту, Эсĕ вĕсене Хăвăн калаçакан кĕтÿне кĕтме лартнă, вĕсем кĕлтунипе мана та, çылăхлăскере, çăл, ырăлăх ту.
Эй, Турă, манăн çылăхăмсене каçарттаракан аттеме (ятне каламалла) çăл, ырăлăх ту, унăн таса кĕллипе манăн çылăхăмсене каçар.
Эй, Турă, манăн атте-аннеме, пиччем-шăллăмсене, аппам-йăмăкăмсене, тăванăм-хурăнташăмсене, тусăм-йышăмсене (ячĕсене кала) пурне те çăл, ырăлăх ту, ку тĕнчере те, леш тĕнчере те ырă курмалла ту вĕсене. Пуççап.
Эй, Турă, ватăсене, çамрăксене, мĕскĕнсене, тăлăха юлнă ача-пăчана, тăлăх арăмсене, чирпе асапланакансене, хуйха ÿкнисене, инкек курса тарăхакансене, хĕн куракансене, тыткăнра пурăнакансене, тĕрмере ларакансене, ют çĕре уйăрса янисене çăл, ырăлăх ту; пуринчен ытла тата Саншăн, Чăн тĕншĕн турăсăр халăхсем, Чĕн тĕнтен уйăрăлнисем, Чăн тĕне пăсакансем хĕсĕрленине чăтакан чурусене асна ил, вĕсем патне пыр, ăшĕсене пусар, Хăвăн хăватупа вĕсене часрах çăмăллăх пар, хăтар, ирĕке кăлар.
Эй, Турă, мана кураймансене, мана хур тăвакансене, мана усал тăвакансене пурне те çăл, ырăлăх ту, маншăн, çылăхлăскершĕн, пĕтмелле ан ту вĕсене.
Чăн тĕне пăрахнисене, Чăн тĕн çинчен йăнăш вĕрентнипе суккăрланнă пĕтес çынсене Ху çинчен пĕлтерсе çутăлтар, вĕсене Хăвăн пĕтĕм çĕр çинче пĕрре анчах, апостолсенчен юлнă таса Чиркĕвÿн çыннисемпе хутăштар.
Вилнисене асăнмалли кĕлĕ
Эй, Турă, вилнĕ чурусене, Ху ырă тăрăх, асна ил, вĕсем хăйсен ĕмĕрĕнче мĕн çылăха кĕнине пурне те каçар, Санран пуçне çылăхсăрри урăх никам та çук, вилнĕ çынсене канăçлăх пама та Эсĕ анчах пултаратăн.
Эй, этеме юратса пур ĕçе те пит пĕлсе йĕркене к ӳ рекен, пурне те усăллă япала Паракан, пурне те туса çитернĕ пĕр Турă, Хăвăн чурусенĕн чунĕсене канлĕхе кĕрт: вĕсен шанчăкĕ Сан çинче, пире пултаракан, пире туса çитерекен Турă çинче, пулнă.
Эй, Турă, Хăвăн вилнĕ чурусенĕн, манăн аттемпе анненĕн, пур тăванăм-хурăнташăмсенĕн (ячĕсене асăнмалла) чунĕсене, чĕрĕлсе тăрса ĕмĕрлĕх пурнăçа кĕрессине ĕмĕтленсе вилнĕ ватăсене, çамрăксене пурне те асăн, вĕсене ĕмĕр асăнмалла ту.
Эй, Христос, Хăвăн чурусенĕн чунĕсене чирсĕр, асапсăр, хуйхăсăр çĕре кĕрт, ĕмĕрлĕх пурнăçра святой çынсемпе пĕрле пурăнма пар вĕсене.
Кĕлĕсене вĕçлес умĕн
Эй, Турра çуратнă Хĕр, Сана асла хурса хисеплеме тĕрĕс тивĕçлĕ, Эсĕ пирĕн Туррăн ĕмĕр мухтавлă Таса Амăшĕ: Эсĕ Херувимсенчен те аслă, Серафимсенчен те мухтавлă, Эсĕ хĕр хальлĕн сăмах Турра çуратнă, Эсĕ Турă Амăшĕ, Сана аслăлатпăр.
Эй, Турă, Турă Ывăлĕ Иисус Христос, Хăвăн чăн Таса Аннÿ кĕлтунипе, ăшĕсенче Турра тытса, таса пурăннă Аттемĕрсем, пур святой çынсем те кĕлтунипе хĕрхен пире. Аминь.
* Мункунран Иисус Христос Туррăмăр Пĕлĕт çине çĕклениччен çак кĕлĕ вырăнне Мункун канонĕн 9-мĕш юррин хушса юрламаллине тата ирмосне вулаççĕ: «Ангел тивлетлĕ Марияна чĕнсе каланă: Эй, Таса Хĕр, савăн! — тенĕ. Тата савăн! тетĕп: Ывăлу виççĕмĕш кунне тупăкран чĕрĕлсе тухрĕ, вилнĕ çынсене чĕртсе тăратрĕ. Эй, çынсем, савăнăр.
Ирмос. Эй, çĕнĕ Иерусалим, йăлтăртатса çуталса тăр. Сана Турă хăвачĕ çутăлтарчĕ. Эй, Сион, паян савăнса хĕпĕртесе тăр. Эй, Таса Турă Амăшĕ, Эс ĕ Ывăлу чĕрĕлнĕшĕн савăн!»
(Çакăн пекех каçхи кĕлĕре те вуламалла.)
Чувашские молитвы на чувашском языке
Молитвы вечерние на чувашском языке
Ашшĕн, Ывăлĕн, Святой Сывлăшĕн ячĕпе. Аминь.
Эй, Турă, Турă Ывăлĕ Иисус Христос, Хăвăн чăн Таса Аннÿ кĕлтунипе, мĕнпур святой çынсем кĕлтунипе çырлах пире. Аминь.
Мухтав Сана, Туррăмăр, мухтав Сана.
Святой Сывлăша йăлăнмалли кĕлĕ
Эй, Çÿлти Патша, Эсĕ чуна лăплантаратăн, Эсĕ тÿрĕ Сывлăш, Эсĕ пур çĕрте пур, Эсĕ пурне те пултаратăн, пур ырăлăх та Санран тухать, чĕрĕлĕх те Эсĕ паратăн, пирĕн ăша кĕрсе вырăнаç; пур усалтан тасат пире, ырă Турă, пирĕн чунсене çăл.
Святой Турă, Святой Хăватлă, Святой Вилĕмсĕр, çырлах пире (3 хут каласа с ă хс ă хламалла).
Мухтав Ашшĕне, Ывăлне, Святой Сывлăшне, халĕ те, кирек хăçан та, ĕмĕр-ĕмĕрех. Аминь.
Виç ипостаçлĕ Турра йăлăнмалли кĕлĕ
Чăн таса Виç ипостаçлĕ Турă, Ху ятушăн çырлах пире. Эй, Турă, çылăхран тасат пире; эй, Патша, эпир йĕркесĕр пурăннине каçар; эй, Святой Сывлăш, пирĕн вăйсăрлăха килсе тÿрлет.
Эй, Турă, çырлах (3 хут).
Мухтав Ашшĕне, Ывăлне, Святой Сывлăшне, халĕ те, кирек хăçан та, ĕмĕр-ĕмĕрех. Аминь.
Эй, Çÿлти Аттемĕр, Санăн яту хисеплентĕр, Санăн Патшалăху килтĕр, Санăн ирĕкÿ çĕр çинче те Çÿлти пекех пултăр; паян пурăнмалăх çăкăр пар пире; эпир хамăра парăмлă пулнисене каçарнă пек, пирĕн парăмсене каçар пире; çылăха ан кĕрт пире; усалтан хăтар пире.
Эй, Турă, хĕрхенсем пире, хĕрхенсем: урăх нимĕн те кала пĕлмесĕр, çак кĕлĕпе анчах эпир, çылăхлăскерсем, Сана, Патша Турра, тархаслатпăр: хĕрхенсем пире.
Мухтав Ашшĕне, Ывăлне, Святой Сывлăшне : Эй, Турă, эпир Сана шанса, ĕмĕтленсе тăратпăр: хĕрхенсем пире; пире пĕтĕмпех çилленсе ан пăрах, пирĕн усал ĕçсене те ан асăн; Ху ырă кăмăллă тăрăх, халĕ те ĕлĕкхи пекех, пирĕн çине ăшă кăмăлпа пăх, тăшмансенчен хăтар пире. Эсĕ пирĕн Турă, эпир пурте, Сан аллупа пулнă Санăн çыннусем, Санăн ятна асăнатпăр.
Эй, Турă, çырлах (12 хут).
Пĕрремĕш кĕлĕ, аслă Макарий святойăн, Атте Турра
Эй, ĕмĕрхи Турă, Эсĕ Ху пултарнă япаласенĕн пуринĕн те Патши, мана çак сехете çитиччен пурăнма патăн, эпĕ паянхи кун е ĕçпе, е сăмахпа, е шухăшпа çылăха кĕнине пурне те каçар. Эй, Турă, мĕскĕн чунăма ÿтĕм ирсĕрĕнчен, усал шухăшсенчен тасат. Эй, Турă, çак çĕрлехи ыйхăма канлĕ çывăрса ирттерме пар мана, эпĕ хамăн мĕскĕн вырăнăм çинчен тăрса малашне пурăнас кун-çулăма Санăн чăн таса ятна юрăхлă ирттерем, хама хирĕç тăракан курăнан тăшмансене те, курăнман тăшмансене те çĕнтерсе пурăнам: эй, Турă, хама ирсĕрлентерекен усал шухăшсенчен, аскăн шухăшсенчен хăтар мана. Патшалăх та, хăват та, аслăлăх та Санăн: Ашшĕн, Ывăлĕн, Святой Сывлăшĕн, халĕ те, кирек хăçан та, ĕмĕр-ĕмĕрех. Аминь.
Иккĕмĕш кĕлĕ, сăваплă Антиохăн пирĕн Туррăмăра Иисус Христоса
Эй, Атте Туррăн Сăмахĕ Иисус Христос, Эсĕ пурне те тытса тăракан Чăн Турă, Хăвăн пит ырă кăмăлупа мана, Ху чуруна, нихăçан та ан пăрахсам, яланах ман ăшăмра пулсам. Эй, Иисус, Эсĕ Хăвăн сурăхусене кĕтекен ырă Кĕтÿçĕ, çĕлене мана астарма ан яр, шуйттан ĕмĕтне ан çитер: ман ăшра çылăх вăрлăхĕ пур. Эй, Святой Патша Иисус Христос, Эсĕ пурте пуççапакан аслă Турă, эпĕ çывăрнă чухне хăвăн ĕмĕр пĕтми çутупа, вĕренекенÿсене тасатнă Святой Сывлăшупа сыхласа тăр мана. Эй, Турă, мана та, Хăвăн тивĕçсĕр чуруна, çывăракан вырăнăм çинче çăлăнмалăхна пар: ăсăма таса Евангелине ăнлантарса çутат. Чунăма хĕресне юраттарса аванлат. Таса сăмахупа чĕреме тасат. Утĕме ху асап курнине астутарса тÿсĕмлĕх пар. Шухăшăма йăвашлăху çинчен шухăшласа сых-ланса тăма пар; выртнă вырăнăм çиичен, кĕлтăвас вăхăтра тăрса, Хăвна тав туса мухтаса тăма пар. Эсĕ ĕмĕртен малтанхи Атте Турăпа, Чăн Таса Сывлăш Турăпа пĕрле ĕмĕрех мухтавлă. Амииь.
3-мĕш кĕлĕ, чăн Таса Сывлăша
Эй, Турă, Çÿлти Патша, чуна лăплантаракан Тÿрĕ Сывлăш, мана, Хăвăн çылăхлă чуруна хĕрхенсе çырлахсам. Эпĕ, тивĕçсĕрскер, паянхи кун çын пек те мар, выльăхран та ытла юрăхсăрскер, мĕн кĕçĕнренпех мĕнле çылăха кĕнине, ирĕксĕр, пĕлсе е пĕлмесĕр, усал ирĕкне вĕреннипе, пуçсăрланнипе, шанăç çухатнипе çылăха кĕнине — пурне те каçар. Эпĕ Санăн ятупа тупа тунă пулсассăн е шухăшпа Сана хурланă, е эпĕ мĕншĕн те пулсан çилленнĕ е суеçтернĕ, е вăхăтсăр çывăрнă, е ман патăма мĕскен килсен, ăна хăваласа кăларнă, е хам тăванăма хуйхăртнă, е хурлантарнă, е кама та пулсан айăпланă, е хама хам асла хунă, е мăнкăмăлланнă, е çилленнĕ, е эпĕ хам кĕлĕре тăнă чух, ăсăм улталанса, ку тĕнчери усаллăх çинчен шухăша кайнă е пысăк шухăш тытнă, е эпĕ нумай çисе нумай ĕçнĕ, е ăссăрланса кулнă, е усал шухăш тытнă, е çын илемлĕхне курса чĕремпе пăсăкланнă, е эпĕ кирлĕ мара калаçнă, е эпĕ хамăн хисепсĕр çылăхсем пулсан та тăванăм çылăхĕнчен кулнă, е кĕлĕре тăма ÿркеннĕ, — хам астуман ытти пур усал ĕçсене тунă пулсан та пурне те каçар мана; эпĕ кусене çеç мар, кунтан та ытларах çылăха кĕнĕ. Эй, мана Пултаракан Патша, Эсĕ çынна савакан ырă Турă, мана, Хăвăн мĕскĕн тивĕçсĕр чуруна, хĕрхенсем, манăн çылăхăмсене пăрах, каçар. Вара эпĕ, аскăн çылăхлă мĕскĕнскер, канлĕ выртса çывăрса каям. Санăн чăн таса ырă ятна Атте Турăпа, унăн пĕртен-пĕр çуралнă Ывăлĕпе пĕрле пуççапса, юрласа, аслăласа тăрам. Халĕ те, кирек хăçан та, ĕмĕр-ĕмĕрех. Аминь.
4-мĕш кĕлĕ, аслă Макарий святойăн
Эй, аслă ырăлăхлă Вилĕмсĕр Патша, çынна савакан уçă кăмăллă Турă, мĕн илсе пырам-ши эпĕ Сан патна, мĕн япалапа тавăрам-ши Сана? Эсĕ мана, Хăвна юрас тĕлĕшрен наянскере, пĕр ырăлăх та туманскере ху енне çавăрса, ман чунăма çăлăнмалла туса, çак иртнĕ кун вĕçне çитмелле турăн. Мана, çылăхлă, кирек мĕнле ырă ĕç тĕлĕшĕнчен те çарамасскере, хĕрхенсем. Виçесĕр çылăхсемпе вараланса ÿкнĕ чунăма çĕклесе тăратсам: манăн мĕнпур шухăшăма ку курăнакан пурăнăçăн усаллăхĕнчен сирсе тăр. Эй, пĕр Эсĕ анчах çылăхсăр Турă, эпĕ çак куна: пĕлсе, пĕлмесĕр, сăмахпа, ĕçпе, шухăшпа, мĕнпур ăсăмпа çылăха кĕнине пурне те каçар: Эсĕ Ху мана Хăвăн Турăлăхун хăвачĕпе, çынна чĕлхе калайми юратнипе, Хăвăн вăюпа пур хирĕç тăракан усалтан та витсе усра. Эй, Турăçăм, тасатсамах манăн нумай çылăхăмсене, тасатсамах. Эй, Турă, мана усал танати-сенчен хăтармашкăн та, çылăхĕсемшĕн çунакан чунăма çăлмашкăн та кăмăллă пул; Хăвăн мухтавлăхупа килнĕ чухне мана Хăвăн çутă сăнупа хупласа тăр; халĕ те ĕнтĕ мана, айăпсăрланмасăр, шухăша-мĕне каймасăр, ыйхăпа çывăрса кайма пар; Хăвăн чурувăн шухăшĕсене шикленмелле мар ту, шуйттанăн мĕнпур тăрăшнине манран сирсе яр, чунăм чĕрин куçĕсене çутатса яр, вара эпĕ вилме çывăрса каймалла ан пулам; Хăвăн канăçлă, сыхлакан, чунăма та, ÿтĕме те пăхса усракан Ангелна яр: вăл мана тăшмансенчен хăтарса тăтăр. Çапла вара эпĕ, вырăнăм çинчен тăрса, Сана тав кĕлли кÿмелле пулам. Эй, Турă, Ху уçă кăмăллă тăрăх мана, Хăвăн çылăхлă, мĕскĕн чуруна, илтсем: ыйхăран тăрсан Хăвăн сăмахусене вĕренмелĕхне пар мана, Хăвăн Ангелусемпе çавăрса илсе, шуйт-танран килекен шанăçсăр шухăша манран хăваласа яр: эпĕ вара Санăн ятна тав туса аслăлам, Эсĕ Ху пире çылăхлă çынсенĕн хутне кĕме панă Санăн чăн Таса Аннÿ Марияна та мухтаса тăрам; Вăл пирĕншĕн кĕлтунине хапăл тусам, — эпĕ пĕлсе тăратăп: Эсĕ çынна юратнине Вăл та тума тăрăшать, пĕр чарăнмасăр çынсемшĕн кĕлтуса тăрать. Эй, Иисус Христос Туррăмăр, Вăл пирĕншĕн хута кĕнипе, Хăвăн таса Хĕресÿ хăвачĕпе, мĕнпур сăваплă çыннусем кĕлтунипе манăн мĕскĕн чунăма сыхласа усра: Эсĕ пур ĕмĕрте те таса, мухтавлă тăратăн. Аминь.
Эй, Туррăмăр, Эсĕ Ху ырă тăрăх этеме юрататăн, эпĕ паянхи кун е сăмахпа, е ĕçпе, е шухăшпа çылăха кĕнине каçар, ырă, канлĕ ыйха пар мана, тĕрлĕ усалтан витсе сыхлама Ангелна яр; Эсĕ пирĕн чуна та, ÿте те пăхса усракан Турă, эпир Сана аслăласа мухтатпăр: Ашшĕне, Ывăлне, Святой Сывлăшне, халĕ те, кирек хăçан та, ĕмĕр-ĕмĕрех. Аминь.
Эй, эпир ĕненекен Туррăмăр, эпир Санăн ятна пур ятран та ытла асăнса тăратпăр: пирĕн, ыйха каякан çыннусенĕн, чунĕсене те, ÿчĕсене те çăмăллат, пур тĕрлĕ шухăша каясран та, тĕттĕм тутлăхран та сыхла пире; усал шухăшсем аптăратнине пĕтер, ÿтĕмĕр çĕкленсе, хĕрсе кайнине сÿнтер; ĕçпе те, сăмахпа та тĕрĕс ăспа тăма пар пире; çапла вара эпир ырă ĕçпе пурăнма хăнăхса кайса, Эсĕ пама пулнă ырăлăхран юлмалла ан пулар, Эсĕ ĕмĕр-ĕмĕрех мухтавлă. Аминь.
Ылтăн Чĕлхе Иоанн святойăн
кăнтăрлахипе çĕрлехи сехет хисепĕ тăрăх
1. Эй, Турă, Çÿлти ырăлăхунтан ан хăвар мана. 2.Эй, Турă, ĕмĕрлĕх асапран хăтар мана. 3.Эй, Турă, эпĕ ăспа, шухăшпа, е сăмахпа, е ĕçпе çылăха кĕнине каçар. 4.Эй, Турă, эпĕ пĕлмесĕр кирек епле çылаха кĕресрен те, манса пуранасран та, тусĕмлех çухатасран та, кăмăл хытса туйми пуласран та хăтар мана. 5.Эй, Турă, пур тĕрлĕ çылăха кĕресрен те хăтар мана. 6.Эй, Турă, усал, аскăн шухăшсем хупласа илнĕ чĕреме çутат. 7.Эй, Турă, эпĕ çылăхлă çын, Эсĕ ырăлăхлă Турă, манăн чунăм тĕрексĕррине кура хĕрхен мана. 8.Эй, Турă, хăватна парса пулăш мана, Санăн таса ятна мухтама юрăхлă пулам. 9.Эй, Турă Иисус Христос, мана, Ху чуруна, чĕрĕлĕх кĕнекине çырса хур, вилнĕ чух мана ырă вилĕм пар. 10.Эй, Турăçăм, Турăçăм, эпĕ Сан умăнта пĕр ырă ĕç те туман пулсан та, çапах Хăвăн тивлетÿпе малашне ырă ĕçсем тăва пуçлама пулăш мана. 11.Эй, Турă, ман чĕрем ăшне Хăвăн ырăлăху сывлăмне антар. 12.Эй, тÿпепе çĕре пултаракан Турă, мана, çылăхлă, йĕрĕнмелле усал чуруна, Хăвăн Патшалăхунта асна илсем. Аминь.
1.Эй, Турă, çылăхăмсенчен ÿкĕннĕ чух хапăл ил мана. 2.Эй, Турă, ан пăрах мана. 3.Эй, Турă, усал пусмăрласран сыхла мана. 4.Эй, Турă, мана ырă шухăш пар. 5.Эй, Турă, ÿкĕнсе йĕме пар мана, вилессĕме астутарса тăр, кăмăлăма çемçет. 6.Эй, Турă, çылăхăмсенчен ÿкĕнес шухăш пар мана. 7.Эй, Турă, мана йăвашлăх, тасалăх пар, Хăвна итлекен ту. 8.Эй, Турă, мана ырă ĕçсем туса пурăнма вĕрент, Хăвăнтан хăраса тăма пар. 9.Эй, Турă, Хăвна пĕтĕм чунăмпа, пур шухăшăмпа юратса пурăнмалла ту мана, эпĕ пĕр ĕçĕмре те Санăн ирĕкÿнтен ан тухам. 10.Эй, Турă, усал çынсенчен, шуйттансенчен, хама хам чараймасран, çавăн пек ытти тĕрлĕ кирлĕ мар япаласенчен те витсе сыхла мана.11. Эй, Турă, Эсĕ пурне те Ху пĕлсе Ху ирĕкÿпе тăватăн: эпĕ те, çылăхлăскер, Сан ирĕкÿ тăрăх пурăнам. 12.Эсĕ ĕмĕр-ĕмĕрех мухтавлă, аминь.
Иисус Христос Туррăмăра
Эй, Турă, Турă Ывăлĕ Иисус Христос, санăн чăн Таса Аннÿне ÿтсĕр Ангелусем кĕлтунипе, Ху умĕн килекен, Хăвна шыва кĕртекен пророку, Турă çинчен вĕрентекен апостолсем, çутă, ырă çĕнтерекен асапланакансем, ăшĕсенче Турра тытса пурăннă таса шухăшлă аттесем, пур сăваплă çынсем те кĕлтунипе халĕ мана шуйттан çавăрса илесрен хăтар. Эй, мана пултаракан Туррăм, Эсĕ çылăхлă çынна вилĕмпех пĕтересшĕн мар, ăна Ху енне çавăрса чĕрĕ тăвасшăн; мана та ĕнтĕ, мĕскĕне, тивĕçсĕрскере, Ху енне çавăрсам, чĕрĕллех мана тамăка илсе каясшăн пулса, мана çисе ярас тесе, çăварне карса тăракан, пĕтерекен çĕленрен хăтар мана. Эй, мана лăплантаракан Туррăм, Эсĕ маншăн, мĕскĕнскершĕн, Ху çине çĕрĕк ÿте илнĕ, мĕскĕнлехрен хăтар мана, манăн мĕскен чунăма лăпланăç пар; манăн чĕрем ăшне Ху хушнине тумалăх, усал ĕçсене хăвармалăх, Хăвăн телейлĕхне илмелĕх шухăш хыв; эй, Турă, эпĕ Сана шанса пурăнтăм, çăл мана.
Эй, ырă Патшан ырă Амăшĕ, Турра çуратнă, чăн таса, мухтавлă Мария, ман ча-русăр чунăма Хăвăн Ывăлун, пирĕн Туррăмăрăн, хĕрхенекен кăмăлне курма пар. Ху кĕлтуса тăнипе ырă ĕçсем тума вĕрент мана; юлашки пурнăçăма çылăхсăр ирттерсе, Сан урлă Рая кĕрем; эй, Турра çуратнă Хĕр, пĕр Эсĕ анчах таса, пĕр Эсĕ анчах мухтавлă.
çынна сыхласа усракан Ангела
Эй, Христосăн мана сыхласа тăракан, манăн чунăмпа ÿт-пĕвĕме пăхса усракан святой Ангелĕ, эпĕ паянхи кун çылăха кĕнине пурне те каçар, тăшман кураймасăр çылăха кĕртесрен хăтар мана, Турра манăн пĕр çырлăхпа та кÿрентерес марччĕ; маншăн, çылăхлă, юрăхсăр чурушăн, кĕлту: мана чăн таса Виç ипостаçлĕ Туррăн, Иисус Христос Туррăмăр Амăшĕн, пур святой çынсенĕн те хĕрхенекен ырă кăмăлĕсене курма юрăхлă ту. Аминь.
Турă Амăшне кондак
Эй, Турă Амăшĕ, Эсĕ хăватлă çар пуçлăхĕ пек, тăшмансене çĕнтеретĕн, эпир, чурусем, тăшмансенчен хăтăлнăшăн Сана тав туса, мухтаса юрлатпăр, Хăвăн пурне те çĕнтерекен хăватлă вăюпа пур йывăрлăхран та хăтар пире. Эпир Сана: эй, Таса Хĕр, савăн тесе калар.
Эй, пит мухтавлă ĕмĕр Хĕр, Христос Турă Амăшĕ, кĕллĕмĕре Хăвăн Ывăлу, пирĕн Турă, патне çитер, Сан урлă Вăл пирĕн чунсене çăлинччĕ.
Эй, Турă Амăшĕ, мĕнпур шанчăкăм манăн Санра, витсе усра мана.
Эй, Турра çуратнă Хĕр, мана, çылăхлăскере, Эсĕ пулăшассине, Эсĕ хута кĕрессине кĕтекенскере, пăрахсах ан хăварсам: эпĕ Сана шанса тăратăп, хĕрхенсем мана.
Иоанникий святой кĕлли
Манăн ĕмĕтленсе тăма Атте Турă пур, тархасласа хăталма Ывăл Турă пур, мана витсе тăракан Святой Сывлăш Турă пур: эй, Виç ипостаçлĕ Таса Турă, мухтав Сана.
Кĕлĕсене вĕçлес умĕн
Эй, Турра çуратнă Хĕр, Сана асла хурса хисеплеме тĕрĕс тивĕçлĕ, Эсĕ пирĕн Туррăн ĕмĕр мухтавлă Таса Амăшĕ: Эсĕ Херувимсенчен те аслă, Серафимсенчен те мухтавлă, Эсĕ хĕр хальлĕн сăмах Турра çуратнă, Эсĕ Турă Амăшĕ, Сана аслăлатпăр.
Эй, Турă, Турă Ывăлĕ Иисус Христос, Хăвăн чăн Таса Аннÿ кĕлтунипе, ăшĕсенче Турра тытса, таса пурăннă Аттемĕрсем, пур святой çынсем те кĕлтунипе хĕрхен пире. Аминь.
Иоанн Дамаскин святой кĕлли
Эй, этеме савакан Патша Турă, çак вырăнах вара маншăн тупăк вырăнне пулĕ-ши? Е Эсĕ мана кун-пуç çутинчех усрасшăн. Акă ман умра тупăк выртать, акă мана вилĕм кĕтсе тăрать. Эй, Турă, хам эпĕ Санăн судунтан та, нихăçан та пĕтес çук асапран та хăратăп, çапах та хам усал ĕç тума чарăнаймастăп: Сана та, хам Туррăма, Санăн чăн Таса Аннÿне те, Çÿлти пур вăй-хăватсене те, хама сыхлакан сăваплă Ангелăма та кÿрентерме чарăнаймастăп. Эй, Турă, Эпĕ Санăн çынна юратакан кăмăлна курма тивĕçлĕ маррине, эпĕ пур айăпа та, асапа та тивĕçлине хам та пĕлсе тăратăп. Эй, Турă, эпĕ çăлăнасшăн, çăлăнасшăн мар пулсан та, çăл мана. Эсĕ ырă пурăнăçлине çăлни вăл аслă ĕç мар, тасине хĕрхенни те пĕрре те тĕлĕнмелле пулас çук: вĕсем Санан ырăлăхна курма тивĕçлĕ. Эсĕ Хăвăн ырăлăхна ман çинче, çылăхлăскер çинче палăрт. Ху этеме савнине ман çинче палăртса тăр, вара Санăн чĕлхе калайми хĕрхенекен кăмăлна манăн усаллăхăм ан çĕнтерейтĕр: Ху епле çăлма кăмăл тăватăн, çăл мана.
Эй, Христос Туррăм, ман куçăма уç, çывăрнă çĕртех вилмелле ан пулам, тăшманăм: çĕнтĕм ĕнтĕ кăна, тесе ан калатăр.
Мухтав Ашшĕне, Ывăлне, Святой Сывлăшне : Эй, Туррăм, чунăм хутне кĕрекен пул, танатасем нумай карса хунă çĕрте çÿретĕп, вĕсенчен хăтарса тăр, çăл мана, Эсĕ этеме савакан ырă Турă.
Хĕрес хывса, Таса Хĕрес кĕллине кала:
Турă тăтăр та, Унăн тăшманĕсем саланччăр, Ăна кураймансем Ун патĕнчен тар-ччăр, тĕтĕм саланса çухалнă пек çухалччăр. Эй, Туррăн чĕрĕ тăвакан ырă хĕресĕ, савăн! Эсĕ Ху çумна пăталанса, тамăка анса шуйттан хăватне пĕтернĕ пирĕн Туррăмăр Иисус Христосăн хăвачĕпе усалсене хăваласа яратăн. Вăл сана, Хăйĕн таса хĕресне, пур тăшмансене те хăваласа яма пире панă тесе, Турра юратса, хăйсем çине хĕрес хывса, савăнса калакансем умĕнче усалсем, ăвăс вут умĕнче шăранса пĕтнĕ пек, пĕтчĕр. Эй, Туррăн чĕрĕ тăвакан ырă хĕресĕ, пире пăхса усракан Турра çуратнă Таса Хĕрпе, мĕнпур святойсемпе пĕрле эсĕ мана ĕмĕрех пулăшса тăр. Аминь
Е кĕскен çакна кала:
Эй, Турăçăм, Хăвăн Чĕрĕлĕх паракан Таса Хĕресÿ хăвачĕпе пур тĕрлĕ усалтан та витсе сыхла мана.
Эй Турă, эпир çылăха кĕнине çăмăллат, пăрах, каçар; ирĕклĕ, ирĕксĕр е сăмахпа, е ĕçпе, е пĕлсе, е пĕлмесĕр, е кăнтăрла,е çĕрле, е ăспа, е шухăшпа çылăха кĕнине пурне те каçар пире: Эсĕ этеме савакан ырă Турă.
Эй этеме савакан Турă, пире кураймансене, пире хур тăвакансене каçар. Ырăлăх тăвакансене ырăлăх ту. Пирĕн тăвансем, хурăнташсем çăлăнасшăн кĕлтунине илт, ĕмĕрлĕх пурăнăçа кĕрт вĕсене. Чирлĕ выртакансем патне пырса, чирĕсенчен тÿрлет. Тинĕс çинче çÿрекенсене лайăх илсе çÿре. Çул çÿрекенсемпе пĕрле çÿре. Пире пулăшакансенĕн, пире хĕрхенекенсенĕн çылăхĕсене каçар. Пире, юрăхсăрскерсене, хăйсемшĕн кĕлтума хушса хăварнисене Хăвăн аслă ырăлăхупа çырлах. Эй Турă, тыткăнра ларакан тăванăмăрсене асна ил, тĕрлĕ асапран хăтар вĕсене. Эй Турă, Хăвăн таса чиркĕвÿсене парне кÿрекенсене, ырăлăх тăвакансене асна ил, вĕсем çăлăнасшăн кĕлтунине илт, ĕмĕрлĕх пурăнăçа кĕрт вĕсене. Эй Турă, пире те, мĕскĕн, çылăхлă, тивĕçсĕр чурусене, асна ил. Пире тытса тăракан чăн Таса Турă, Амăшĕ, ĕмĕр Хĕр Мария кĕлтунипе, мĕнпур святой çынсем кĕлтунипе пирĕн ăса Хăван ăсу çуттипе çутат, Хăвăн йĕркÿсем тăрăх пурăнма вĕрент. Эсĕ ĕмĕр-ĕмĕрех мухтавлă тăратăн. Аминь.
Ыйăха кайнă чух çакна кала:
Эй Турăçăм Иисус Христос, чунăма Сан аллуна паратăп. Эсĕ пилле мана, Эсĕ хĕрхен мана, ĕмĕрлĕх пурăнăç пар мана. Аминь.
